Í nútímasamfélagi okkar Íslendinga þarf maður oft að staldra við og hrista höfuðið vonleysislega yfir samfélagsgerðinni og því sem þekkist í daglegu tali sem kvenfrelsi vestrænna nútímakvenna. Það gengur á ýmsu og virðist manni oft sem að skollaeyrum sé skellt við þeirri dapurlegu heimsmynd er við blasir ungdómnum, veruleika nauðgana, átraskanna, útlitsdýrkunar og hreinnar afturfarar í kvennabaráttunni.

 Í, að er virðist, eilífri baráttu manns sjálfs við að berjast á móti þróuninni fær maður að heyra það ítrekað að baráttan sé töpuð, maður sé nöldurseggur og óyndismanneskja og jafnvel þurfi aðeins að senda á mann einn „grjótharðann“.

Við undirbúning Druslugöngunnar barst hjálpin alls staðar að og mátti skýrt og skilmerkilega finna það á meðbyr þeim er við fengum að baráttumanneskjunum fer fjölgandi, samfélagið er að opnast, ný bylting er í augsýn.

Það er því miður sjaldnar sem  að karlmenn leggja kvennabaráttunni lið í verki, nema þá í þar til gerðum átaksverkefnum og er það því sem maður himin höndum taki þegar að baráttukarlar láta ljós sitt skína. Við Druslugöngukonur birtum því baráttuglaðar pistil skrifaðan af hinum dularfulla Sigurbirni, sem var egghvöss ádeila á samfélagið vel ígrunduð og greinilega skrifuð af manneskju sem að lét sig málin varða.

Það var okkur því mikill harmur að heyra af sviplegu fráfalli hans nú nýverið þe. manninum á bak við Sigurbjörn, Gunnar Hrafn Hrafnbjargarson og vildum við koma á framfæri dýpstu samúðarkveðjum til vina hans og fjölskyldu, óuppfyllanlegt skarð hefur nú verið hoggið í líf ykkar og er það okkar dýpsta von að þið finnið frið og styrk á erfiðum tímum. 

Við eftirlifendur höldum minningu hans lifandi með því að láta hugðarefni hans ekki gleymast, standa saman að réttlátari heimi og eins og Sigurbjörn sagði: " Í samfélagi jafnréttis fá allir eitthvað fyrir sinn snúð. Jafnrétti er ekki bara á ábyrgð kvenna. Það er líka á ábyrgð karla. Það er kominn tími til þess að karlar skeri upp herör gegn orðræðunni, að þeir axli ábyrgð. Það er kominn tími til þess að karlar hætti að vera öðlingar og byrji að vera femínistar"

fh. druslugöngukvenna
María Lilja Þrastardóttir